Адзiн з прадстаўнiкоў роду Гедройцаў – Мiхал Ян Генрык Гедройць – з'яўляецца нашым сучаснiкам. Нарадзiўся ён у былым маёнтку Лобзаў Слонiмскага павета. У 1940 г. разам з мацi i сёстрамi быў дэпартаваны ў Сiбiр. З 1947 г. жыў у Англii. Скончыў Лонданскi ўнiверсiтэт, працаваў у авiяцыйнай прамысловасцi, чытаў лекцыi па аэрадынамiцы ў Саўтгемптанскiм унiверсiтэце. Адначасова даследаваў гiсторыю. За навуковую працу па гiсторыi Вялiкага княства Лiтоўскага атрымаў у 1989 г. вучоную ступень магiстра, стаў прафесарам. У 1991 г. Гедройць наведаў Лiтву, удзельнiчаў у рабоце VII Уселiтоўскага сiмпозiума. Праз тры гады прыехаў у Беларусь як назiральнiк у час выбараў. З дапамогай МАБ устанавiў крыж на месцы гiбелi свайго бацькi, Тадэвуша Гедройца, якi быў расстраляны супрацоўнiкамi НКУС 25 чэрвеня 1941 г. на "Дарозе смерцi" (памiж Мiнскам i Чэрвенем). Падчас вiзiту М.Гедройць перадаў у Цэнтр iмя Ф.Скарыны свае рукапiсныя ўспамiны пра бацьку, матэрыялы па генеалогii роду Гедройцаў, ксеракопii прац, у якiх ёсць звесткi па гiсторыi хрысцiянiзацыi Беларусi.