Міхаіл Кліменцьевіч Вінаградаў нарадзіўся ў в. Навасады Чашніцкага раёна Віцебскай вобласці. Скончыў факультэт архітэктуры Беларускага політэхнічнага інстытута (1968). Працаваў у праектных арганізацыях «Белдзяржпраект» і «Мінскпраект», узначальваў архітэктурна-планіровачнае ўпраўленне Мінгарвыканкама. З 1998 г. кіраваў персанальнай творчай майстэрняй, якая займалася комплексным праектаваннем будынкаў і збудаванняў рознага прызначэння, ажыццяўленнем аўтарскага нагляду за будаўніцтвам.

Пры ўдзеле архітэктара запраектавана больш за чатыры дзясяткі аб’ектаў. Большасць з іх былі рэалізаваны ў Мінску і яго ваколіцах: будынак Нацыянальнай бібліятэкі Беларусі, чыгуначны вакзал з падземным узроўнем і комплексным добраўпарадкаваннем прывакзальнай плошчы, кінатэатр «Масква», будынак галаўнога офіса ААТ «Белгазпрамбанк» па вуліцы Прытыцкага, адміністрацыйны будынак парфумна-касметычнай фабрыкі «Модум – наша касметыка» і інш.

Міхаіл Вінаградаў з’яўляецца аўтарам шэрага значных праектаў, сярод якіх ‒ комплекс ВДНГ Узбекскай ССР (Ташкент), гісторыка-археалагічны комплекс «Бярэсце» (Брэст), санаторый «Белая Русь» на возеры Нарач. Творчая майстэрня М. Вінагарадава з’яўляецца ўладальнікам Гран-пры і дыпломаў рэспубліканскіх аглядаў-конкурсаў, Гран-пры Міжнароднага фестывалю архітэктуры (Масква, 2000), сертыфіката Міжнароднай акадэміі архітэктуры (Сафія, 2003), дыплома Міжнароднай асацыяцыі саюзаў архітэктараў (Масква, 2007).

Міхаілу Вінаградаву двойчы прысуджалася Дзяржаўная прэмія Рэспублікі Беларусь (2004, 2008). Ён быў адзначаны медалём «За працоўныя заслугі», знакам Міністэрства культуры Рэспублікі Беларусь «За ўклад у развіццё культуры Беларусі».

Матэрыял падрыхтаваны ў 2023 г.