Творчасць Аляксея Пятровіча Кагадзеева аказала значны ўплыў на развіццё харавога мастацтва Беларусі. Пад яго кіраўніцтвам адбылося станаўленне і росквіт опернага хору Нацыянальнага акадэмічнага Вялікага тэатра оперы і балета Рэспублікі Беларусь.

Нарадзіўся А. Кагадзееў у г. п. Альхаватка Данецкай вобласці ў сям’і шахцёра. У даваенны час скончыў 8 класаў агульнаадукацыйнай школы і 3 гады наведваў заняткі ў музычнай школе. У гады Вялікай Айчыннай вайны быў вывезены на прымусовыя работы ў Германію. У лютым 1945 г. здолеў уцячы з палону і далучыўся да Чырвонай арміі, прымаў удзел у баях. Пасля Перамогі быў артыстам армейскіх духавых аркестраў і ансамбляў песні і танца.

У 1946 г. А. Кагадзееў паступіў у Мінскае музычнае вучылішча, дзе вучыўся па класе народных інструментаў і адначасова слухаў лекцыі на гісторыка-тэарэтычным факультэце. У 1956 г. з адзнакай скончыў дырыжорска-харавое аддзяленне Беларускай дзяржаўнай кансерваторыі імя А.В. Луначарскага (клас Г. Зелянковай). Вучыўся ў аспірантуры Ленінградскай кансерваторыі імя М.А. Рымскага-Корсакава, прайшоў стажыроўку ў Дзяржаўным акадэмічным тэатры оперы і балета ў Ленінградзе.

З 1959 г. А. Кагадзееў з’яўляўся хормайстрам, з 1960 па 1993 г. галоўным хормайстрам Дзяржаўнага тэатра оперы і балета Беларусі. За гэты час дырыжор прыняў удзел у пастаноўцы 68 спектакляў, сярод якіх – оперы «Арэстэя» С. Танеева і «Атэла» Дж. Вердзі (1963), «Багема» Дж. Пучыні (1968), «Хаваншчына» (1970) і «Барыс Гадуноў» (1974) М. Мусаргскага, «Залаты пеўнік» М. Рымскага-Корсакава (1971), «Міндыя» А. Тактакішвілі (1973), «Новая зямля» Ю. Семянякі (1982), «Вайна і мір» С. Пракоф’ева (1985), «Дзікае паляванне караля Стаха» У. Солтана (1989), «Кармэн» Ж. Бізе (1990), «Князь Наваградскі» А. Бандарэнкі (1992), вакальна-харэаграфічнае прадстаўленне «Карміна Бурана» на музыку К. Орфа (1983) і інш. У 1971 г. А. Кагадзееву было прысвоена ганаровае званне народнага артыста БССР.

У 1960–1973 гг. А. Кагадзееў выступаў таксама як оперна-сімфанічны дырыжор. Адначасова з 1958 г. выкладаў на кафедры харавога дырыжыравання кансерваторыі. Сярод яго вучняў – народная артыстка Беларусі Н. Ламановіч, хормайстры Г. Луцэвіч, Н. Андросава.

Аляксей Пятровіч Кагадзееў – аўтар вучэбна-метадычных прац, у тым ліку «В помощь дирижеру хора» (1967) і «Техника хорового дирижирования» (1968).

Матэрыял падрыхтаваны ў 2026 г.