У 1960–80-я гг. з усіх куткоў свету – Рыма, Токіа, Мехіка, Мюнхена, Манрэаля і Будапешта – прыходзілі звесткі аб бліскучых выступленнях на самых буйных міжнародных спаборніцтвах савецкіх фехтавальшчыкаў, сярод якіх было шмат прадстаўнікоў Беларусі. Майстэрствам, віртуознай тэхнікай, мужнасцю і смеласцю Т. Самусенка, А. Бяловай, В. Сідзяка, А. Ніканчыкава, А. Раманькова і іншых захапляліся тысячы прыхільнікаў фехтавання на рапірах, шаблях і шпагах. Менавіта беларусы першымі парушылі панаванне спартсменаў Францыі і Італіі на алімпійскай, сусветнай і еўрапейскай арэнах. Побач з імёнамі славутых майстроў сталёвага клінка нязменна называліся і імёны іх настаўнікаў, сярод якіх пачэснае месца належыць Ларысе Пятроўне Бокун – мнагакратнай чэмпіёнцы Беларусі, адной з заснавальнікаў і кіраўнікоў беларускай фехтавальнай школы.

Яна нарадзілася ў Новарасійску. У 1947 г. пасля заканчэння Дзяржаўнага цэнтральнага ордэна Леніна інстытута фізічнай культуры ў Маскве была накіравана ў Мінск. Выкладчыцкую працу ў Беларускім дзяржаўным інстытуце фізічнай культуры Л. Бокун сумяшчала з трэніроўкамі. У кастрычніку 1947 г. стала чэмпіёнкай СССР па фехтаванні на рапірах у камандным першынстве. У пасляваенны час у рэспубліцы толькі зараджаўся гэты від спорту, і Ларыса Пятроўна разам з мужам Г. Бокунам і іншымі энтузіястамі (Ю. Дзексбахам, К. Булачко, Л. Воблікавым) пачалі ствараць беларускую школу фехтавання. Яны хадзілі па школах, набіралі ў секцыі хлопчыкаў і дзяўчынак, вучылі трымаць рапіру і шпагу, весці бой, а потым наладжвалі паказальныя выступленні ў парках, на стадыёнах, адкрытых пляцоўках. У 1948 г. Л. Бокун стала майстрам спорту СССР і праз год перайшла на трэнерскую работу. На працягу некалькіх гадоў займалася пошукам і падрыхтоўкай юных фехтавальшчыкаў у дзіцячых школах, вучылішчах алімпійскага рэзерву і іншых спартыўных арганізацыях Мінска. У 1975 г. была прызначана трэнерам Рэспубліканскай школы вышэйшага спартыўнага майстэрства. Да 1981 г. з’яўлялася трэнерам зборнай каманды СССР. З 1984 г. працавала ў Рэспубліканскім вучылішчы алімпійскага рэзерву. Сярод яе выхаванцаў – алімпійскія чэмпіёнкі А. Бялова, Т. Самусенка, сярэбраны прызёр XXII летніх Алімпійскіх гульняў І. Ушакова, чэмпіёнка СССР І. Астапенка і інш.

Ларыса Бокун за вялікія дасягненні ў выхаванні спартсменаў атрымала ганаровыя званні заслужанага трэнера БССР (1961), заслужанага трэнера СССР (1967) і заслужанага дзеяча фізічнай культуры БССР (1971). Яна ўзнагароджана ордэнамі Дружбы народаў і “Знак Пашаны”.

Матэрыял падрыхтаваны ў 2015 г.