Мінскі дзяржаўны мастацкі каледж імя А. К. Глебава – своеасаблівы культурны феномен другой паловы ХХ – пачатку ХХI ст. Ён прайшоў цікавы шлях станаўлення і развіцця. Гэта адна з найбольш адметных і аўтарытэтных сярэдніх спецыяльных навучальных устаноў адукацыі ў краіне, якая рыхтуе прафесійных мастакоў.

У канцы ХIХ – пачатку ХХ ст. у Віцебску існавала школа-майстэрня мастака Ю. Пэна, на аснове якой у 1918 г. была створана Віцебская народная мастацкая школа. Першы набор навучэнцаў склаў каля 120 чалавек. На базе школы М. Шагал заснаваў Віцебскае народнае мастацкае вучылішча (1919–1923, 1934–1941; з 1923 па 1934 г. – Віцебскі мастацкі тэхнікум). У 1941 г. у сувязі з пачаткам Вялікай Айчыннай вайны вучылішча спыніла сваю дзейнасць і аднавіла толькі ў 1947 г. у Мінску. Так было створана Мінскае мастацкае вучылішча, на той час адзіная навучальная ўстанова, якая рыхтавала мастакоў. Умовы працы былі вельмі складаныя: заняткі праходзілі ў дзве змены ў маленькіх, непрыстасаваных памяшканнях, але калектыў выкладчыкаў і навучэнцаў разам пераадольвалі ўсе цяжкасці, стваралі творчую атмасферу, дзе новыя ідэі, мары і эксперыменты знаходзілі сваё ўвасабленне. Навучэнцы выязджалі на пленэры, працавалі з натурай, імкнуліся дакладна перадаць у сваіх творах задуманае. У 1969 г. вучылішчу прысвоена імя А.К. Глебава, народнага мастака БССР, славутага беларускага скульптара. З 1992 г. установа называлася Мінскае мастацкае вучылішча пры Беларускай акадэміі мастацтваў, з 1997 г. Мінскае мастацкае вучылішча імя А.К. Глебава пры Беларускай акадэміі мастацтваў, з 2001 г. Мінскае дзяржаўнае мастацкае вучылішча імя А.К. Глебава, з 2011 г. мае сучасную назву. У каледжы ажыццяўляецца адукацыйная, метадычная, сацыяльна-культурная работа, у аснову якой пакладзена спалучэнне традыцыйных метадаў з новымі прыёмамі і формамі навучання. Важнымі задачамі з’яўляюцца навучанне асновам прафесійнага майстэрства, развіццё мастацкай інтуіцыі, уменне паспяхова прайсці шлях ад ідэі твора да яе рэалізацыі. Паступіць у каледж заўсёды было складана. Прафесійныя патрабаванні да абітурыентаў з кожным годам узрастаюць. Установа прымае асоб з базавай адукацыяй. Навучанне дзённае, на бюджэтнай і камерцыйнай аснове, і яго тэрмін складае 3 гады 10 месяцаў. Сёння каледж рыхтуе кадры па наступных спецыяльнасцях: жывапіс, скульптура, дэкаратыўна-прыкладное мастацтва, дызайн. Важнае месца ў навучальным працэсе займае практыка. Жывапісцы праходзяць яе ў Мінску і яго ваколіцах, дзе шмат прыгожых, маляўнічых краявідаў, скульптары – у каледжы і на ліцейным заводзе, будучыя дызайнеры распрацоўваюць канкрэтныя праекты, напрыклад, афармляюць школы і інш. Каледж мае вельмі багаты ўласны мастацкі фонд, які налічвае каля 2,5 тыс. работ.

У розныя гады ўстанову ўзначальвалі І. Краснеўскі, У. Ермаловіч, С. Цуканаў, А. Краўчук, А. Курловіч, М. Басалыга, В. Ясюк. Зараз дырэктарам з’яўляецца А. Шантаровіч. З самага пачатку існавання тут працавала шмат таленавітых і адданых сваёй справе майстроў-жывапісцаў, скульптараў, графікаў. Вялікі ўклад у фарміраванне сучаснай прафесійнай мастацкай школы ўнеслі настаўнікі-мастакі В. Цвірка, Л. Лейтман, А. Бембель, В. Волкаў, У. Хрусталёў, Н. Галоўчанка, А. Шаўчэнка, Т. Ігнаценка, А. Малішэўскі, М. Лісоўскі, А. Луцэвіч, Л. Шчамялёў і многія іншыя. Навучальная ўстанова падрыхтавала ўжо некалькі тысяч спецыялістаў, некаторыя з выпускнікоў прадоўжылі вучобу ў вышэйшых навучальных установах Беларусі, Расіі, Чэхіі і інш. Сярод выпускнікоў вядомыя ў нашай краіне і за яе межамі мастакі М. Савіцкі, М. Апіёк, Д. Алейнік, С. Вакар, У. і М. Басалыгі, В. Грамыка, Л. Гумілеўскі, А. Кашкурэвіч, З. Літвінава, І. Стасевіч, В. Шаранговіч і інш. Каледж заўсёды адказна ставіўся да сваёй пачэснай, хоць і нялёгкай справы. Умовы ж для якаснага забеспячэння адукацыйнага працэсу былі не заўсёды спрыяльнымі. Доўгі час каледж не меў свайго ўласнага памяшкання.

Навучальная ўстанова прымае актыўны ўдзел у культурным жыцці Беларусі і замежжа. Арганізоўвае выстаўкі сваіх навучэнцаў, выпускнікоў і выкладчыкаў, праводзіць пленэры, конкурсы, майстар-класы і інш. Дзейнічаюць праекты – творчы «Партрэт ветэрана», валанцёрскі «Падары радасць дзецям» (з грамадскай дабрачыннай арганізацыяй «Беларускі дзіцячы хоспіс»). Разам з Міністэрствам культуры Рэспублікі Беларусь каледж з'яўляецца заснавальнікам адкрытага дзіцяча-юнацкага конкурсу выяўленчага мастацтва «КрасаWeek». Многія навучэнцы ўстановы сталі лаўрэатамі і прызёрамі міжнародных, рэспубліканскіх конкурсаў, стыпендыятамі спецыяльнага фонду Прэзідэнта Рэспублікі Беларусь па падтрымцы таленавітай моладзі.

Дыплом Мінскага дзяржаўнага мастацкага каледжа імя А.К. Глебава – своеасаблівы знак якасці для кожнага яго выпускніка. Таленавітыя мастакі, якія вучыліся ў каледжы, узбагацілі айчыннае выяўленчае мастацтва выдатнымі творамі жывапісу, скульптуры, графікі, дэкаратыўна-прыкладнога мастацтва.

Матэрыял падрыхтаваны ў 2017 г.